Wasiirka Arrimaha Dibadda Soomaaliya oo la kulmay Dhigiisa Shiinaha “SAWIRRO”

Wasiirka Arrimaha Dibedda Soomaaliya ayaa dalka Shiinaha kulan kula qaatay dhiggiisa dalkaas oo ay ka wada hadleen sidii Soomaaliya looga faa’iideyn lahaa mashaariicda Shiinuhu ka fuliyo Qaaradd Afrika.

Mudane Axmed Ciise Cawad Wasiirka Arrimaha Dibedda Soomaaliya oo wareysi siinayey Warbaahinta Qaranka ayaa sheegay in kulanka uu la qaatay dhigiisa Shiinaha uu la xiriiray sidii ay Soomaaliya uga faa’iideysan lahayd mashaariicda horumarineed ee ay dowladda Shiinaha ka wadaan Afrika.

“Waxaan kulan gaar ah la qaatay Wasiirka Arrimaha dibada Shiinaha waxaan ka wada hadalnay xiriirka soo jireenka ah ee labada iyo sidii loo xoojin lahaa, waxaan kaloo ka wada hadalnay sidii Soomaaliya ay uga faa’iideysan lahayd mashaariicda ay Shiinaha ka waddo Afrika” ayuu yiri Wasiirka.

Wasiirka Arrimaha Dibedda Soomaaliya ayaa sidoo kale sheegay in socdaalka ay u joogaan Shiinaha ay tahay sidii ay dabagal ugu sameyn lahaayeen waxyaabihii ay ku heshiiyeen sanadkii la soo dhaafay Madaxda Afrika iyo Shiinaha, gaar ahaan shirkii iskaaashiga dhanka horumarka ee bishii September ee sanadkii tegay lagu qabtay dalka Shiinaha, kaasi oo la isku raacay in Shiinaha uu xoojin doono iskaashiga uu la leeyahay Afrika.

Wasiir Cawad ayaa yiri “Waxaan kaloo la kulanay wafuuda shirka ka soo qeybgalay, gaar ahaan Wasiirada Arrimaha dibadda iyo hay’adaa Maaliyadda ee dalka Shiinaha, gaar ahaan Madaxda Bankiyada dalka Shiinaha oo aan kala hadalnay sida uu dal waliba uga faa’iideysan karo mashaariicda ay Shiinaha wadaan, muhiim ayay noo ahayd inaan fahano”.

Mohamed Osman Abdi (Black Cobra)

 

 

LEAVE A REPLY

Please enter your comment!
Please enter your name here