Wasiirka cusub ee Cadaaladda Koonfur Galbeed oo kormeeray xarunta Wasaaradda

Wasiirka Wasaaradda Cadaaladda, Arimaha Garsoorka ee Dowlad Goboleedka Koonfur Galbeed Soomaaliya Mudane Xasan Ibraahim Xasan oo dhowaan la wareegay xafiiska ayaa maanta  kormeer ku sameeyay qaar ka mid ah xafiisyada Wasaaradda ay ka koobantahay, halkaasi oo uu warbixin kaga dhageystay howlaha shaqo ee ka socoto xarunta.

Mudane Xasan Ibraahim Xasan ayaa kormeerkiisa kadib kulan is barasho ah la qaatay Agaasime Waaxeedyada Wasaaradda, kuwaasi oo dhankooda u gudbiyay Wasiirka baaiyaha ka jirta Wasaaradda, caqabadaha iyo sida looga gudbi karo.

Wasiirka Wasaaradda Cadaaladda, Arimaha Garsoorka ee Dowlad Goboleedka Koonfur Galbeed Soomaaliya oo wareysi gaar ah siiyay Radio Muqdisho ayaa tilmaamay in uu wax badan ka qaban doono baahiyaha ay soo gudbiyeen qaar ka mid ah Agaasime waaxeedyada Wasaaradda, uuna diyaar u yahay in uu la yimaado qorshe howled uu wax kaga badalayo hanaanka shaqo ee Wasaaradda Cadaaladda Koonfur Galbeed.

Mudane Xasan Ibraahim Xasan ayaa xusay in sanadkan inta ka dhiman uu dhamaan deegaannada Koonfur Galbeed ka hirgelin doono xarumaha Cadaaladda iyo Garsoorka, si bulshada loo gaarsiiyo adeegyada dowladnimada, isagoo hay’adaha samafalka ka codsaday inay kaalmo dhinac kasta leh la soo gaaraan bulshada ku dhibaateysan qaar ka mid ah deegaannada Koonfur Galbeed.