Wasiirka Ganacsiga iyo Warshadaha XFS oo Muqdisho ka furay Shirka Madasha ganacsiga Soomaaliya iyo Talyaaniga+Sawirro

Masuuliyiin ka tirsan dowladaha Soomaaliya iyo Talyaaniga, wakiillo ka socday hay’adda UNIDO, xubno ka socday maamul Goboleedyada, ganacsato iyo qeybaha kala duwan ee bulshada ayaa ka qeyb galay Shirkan oo cinwaan looga dhigay  Madasha ganacsiga Soomaaliya iyo Talyaaniga, iyadoo u jeedkuna uu yahay xiriir ganacsi oo qotodheer oo dhexmara labada dhinac, ka shaqeynta kobcinta dhaqaalaha Soomaaliya, xoojinta kaabayaasha dhaqaale, hirgelinta Warshado yar yar, iyo dhiirigelinta wax soo saarka dalka sida Beeraha, Kalluunka iyo xoolaha intaba.

Shirka oo socon doono muddo laba maalin ah waxaa soo qaban qaabisay Wasaaradda Ganacsiga iyo Warshadaha oo kaashaneysa hay’adda Qaramada midoobay u qaabilsan horumarinta Warshadaha ee UNIDO,waxaana daahfuray Wasiirka Ganacsiga iyo Warshadaha Soomaaliya mudane Cabdullahi Cali Xasan oo tilmaamay In Soomaliya ay kasoo gudubtay xilliyadii la kaalmeyn jiray haddana la joogo waqtigii ay Kheyraadkeeda ka faa’iideeysan laheyd.

Guddoomiyaha rugta ganacsiga Soomaaliyeed Maxamuud Cabdikariin Gabeyre ayaa ganacsatada ugu baaqay inay wada shaqeyn dhow la yeeshaan dhigooda  Talyaaniga si loo helo is dhexgal ganacsi oo horumar horseedi kara.

Safiirka Dowladda Talyaaniga ee Soomaaliya Mudane Alberto Vecchi ayaa sheegay inay rajeynayaan in dhamaadka shirkan ay kasoo baxaan waxyaabo wax ku ool u ah labada dhinac .

Wasiiru dowlaha xafiiska Ra’iisul Wasaaraha Soomaaliya, Cabdullaahi Xaamud Maxamed ayaa tilmaamay inuu shirkan horseedi doono in suuqyo cusub ay helaan ganastada Soomaaliyeed.

Shirka Madasha ganacsiga Soomaaliya iyo Talyaaniga ayaa la filayaa Inuu horseed u noqdo kobac dhaqaale iyo Maalgelin si loo helo shaqo abuur loona yareeyo saboolnimada.

 

 

LEAVE A REPLY

Please enter your comment!
Please enter your name here