Wasiirka Ganacsiga oo ganacsatada kala hadlay inaan sare loo qaadin maciishadda COVID-19 awgiis “SAWIRRO”

Wasiirka Wasaaradda Ganacsiga iyo Warshadaha Soomaaliya Inj. Cabdullaahi Cali Xasan, ayaa maanta xafiiskiisa kulan is-xog-waraysi ah oo ku saabsan saameynta dhaqaale ee cudurka COVID-19 uu ku keeni karo maciishadda dalka la yeeshay mas’uuliyiinta Rugta Ganacsiga iyo Warshadaha Soomaaliya oo uu hogaaminaayey Guddoomiyaha Rugtaasi Maxamuud Cabdikariin Gabeyre iyo Ganacsato kala duwan oo Soomaaliyeed.

Kulankan oo sidoo kale ay ka soo qeyb-galeen Agaasimaha guud mudane Cabdicasiis Ibraahim Aadan iyo mas’uuliyiin kale oo ka tirsan Wasaaradda, ayaa ujeedkiisu ahaa sidii  Wasaaraddu ay Ganacsatada uga heli lahayd xogo la xiriira badeecadaha dalka, gaar ahaan kaydka raashinka, waxaana ay sheegeen in illaa iyo hadda uu dalku haysto badeecado ku filan oo aanay qabin wax wel wel ah sidoo kale na ay taagan yihiin Maraakiib dalka u sida raashin tiro badan.

Ganacsatadu, waxa kale oo ay halkaas ka sheegeen caqabadaha jira iyo weli tallooyin ku aadan sida ugu habboon ee loogga hor-tagi karo saameynta dhaqaale ee uu keeni karo cudurka Coronavirus ( COVID-19).

Inj. Cabdullaahi Cali Xasan Wasiirka Ganacsiga oo ugu dambeyn halkaas ka hadlay, ayaa sheegay inay ka dawlad ahaan diyaar u yihiin tallaabo kasta oo loogga hortagi karo saameynta dhaqaale ee cudurkaasi ku keeni karo maciishadda dalka, waxaana uu carabka ku dhuftay inay Ganacsatada ka taageerayaan siddii loo yareyn lahaa caqabadaha jira iyo fududeynta Ganacsiga, isaga oo ku dhiiri-geliyey in shacabka loo naxariisto wakhtiyadan adag isla-mar-ahaantaana aan kor loo qaadin qiimaha maceeshadda dalka.

LEAVE A REPLY

Please enter your comment!
Please enter your name here