Wasiirka Howlaha Guud ee Koonfur Galbeed oo sheegay inay socdaan mashaariicyo dib u dhis loogu sameynayo waddooyinka deegaannada Maamulkaas “SAWIRRO”

Wasiirka Howlaha Guud iyo Guryeynta ee dowlad Goboleedka Koonfur Galbeed mudane Axmed Nuur Sheekh Maxamed (Mashruuc) ayaa sheegay in dhawaan ay bilaabi doonaan dib u dhiska waddooyin ku yaala magaalada Baydhabo ee xarunta Gobolka Baay oo xarun KMG u ah dowlad Goboleedka Koonfur Galbeed.

Wasiirka Howlaha Guud ee Koonfur Galbeed oo la hadlay Radio Muqdisho ayaa sheegay in horaanta bisha soo socoto la qorsheynayo in la dar dargeliyo dhismaha waddooyinka magaalada Baydhabo oo uu ku tilmaamay inay mihiim u  yihiin isu socodka gaadiidka iyo dadweynaha, ayna gaarsiin doonaan ilaa iyo 20km.

“Waxaa noo qorsheysan fulinta waddooyin dib u dhis lagu sameynayo oo ku yaala magaalada Baydhabo, waxaana bar bar socda mashaariic kale oo arrimaha waddooyinka lagu horumarinayo, tani waxa ay ka timid fikirka Madaxweynaha Dowlad Goboleedka Koonfur Galbeed” ayuu yiri mudane Axmed Mashruuc.

Wasiirka Howlaha Guud iyo Guryeynta ee dowlad Goboleedka Koonfur Galbeed mudane Axmed Nuur Sheekh Maxamed ayaa xusay in Wasaaraddu ay howlo mashaariic ah ka fulisay Gobollada Shabeelaha Hoose iyo Bakool, kuwaasi oo qeyb ka ah howlaha Wasaaradda loo igmaday.

“Shabeelaha Hoose mashaariic horumar leh oo muhiim ah ayaa ka socda, oo ay ka midyihiin xarumo caafimaad, goobo waxbarasho, dhismaha waddooyinka oo haatan aan ka wadno degmada Wanlaweyn ee gobolka Shabeelaha Hoose, dhanka kale Gobolka Bakool qaar ka mid ah degmooyinka Ceelbarde iyo Xudur waxaan ka hirgelinay mashaariic kuwan la mid ah” ayuu yiri Wasiirka Howlaha Guud ee Koonfur Galbeed.

Mudane Axmed Nuur Sheekh Maxamed (Mashruuc) ayaa hoos ka xariiqay in Wasaaradda ay ka howlgalaan injineero qibrad u leh howlaha Wasaaradda u igmantahay, isagoo ka digay in shaqada Wasaaradda ee ah howlaha guud iyo Guryeynta ay qabtaan hay’ado kale.

“Wasaaradda Howlaha Guud waxa ay ku guuleysatay inay shaqaaleysiiso Injineero taqasus ku leh howlaha ay Wasaaraddu qabato, si ay gacan uga geystaan dib u dhiska goobaha muhiimka u ah dowlad goboleeda Koonfur Galbeed, ayna ula xisaabtamaan shirkadaha howsha gacan ka siinaya Wasaardda, waxaana ka digayaa in cid aan Wasaaradda ahayn qabato howlo dib u dhis ah” ayuu yiri Wasiir Axmed Mashruuc.

 

 

 

LEAVE A REPLY

Please enter your comment!
Please enter your name here