Wasiirka Warfaafinta iyo Guddoomiyaha gobolka oo si wadajir ah u furay tartan cilmiyeedka Warbaahinta Qaranka “SAWIRRO”

0
4146

Wasiirka Wasaaradda Warfaafinta, iyo Hanuuninta Dadweynaha ee Xukuumadda Federaalka Soomaaliya Mudane Eng, Cabdiraxmaan Cumar Cismaan Yariisow  iyo Guddoomiyaha Gobolka Benaadir Thaabit Cabdi Maxamed ayaa caawa si rasmi ah u furay tartan cilmiyeedka bisha Ramadaan oo sanad waliba ay Warbaahinta Qaranka u qabato degmooyinka gobollada dalka, iyadoo sanadkii Afaraad barnaamijka ay taaba galineyso maamulka gobolka Banaadir.

Munaasabad kooban oo lagu furayey Tartan Cilmiyeedka Ramadaan ee sanadkan oo lagu qabtay Istuudiyaha Radio Muqdisho ayaa waxaa ka qeyb galay Agaasimaha Radio Muqdisho, Agaasimaha Telefishinka Qaranka, Ku-simaha Agaasimaha Guud ee Wasaaradda Warfaafinta, Guddoomiyaha Maamulka gobolka Banaadir ahna duqa Muqdisho, Wasiirka Warfaafinta iyo Hanuuninta dadweynaha iyo xubnaha guddiga tartan cilmiyeedka Bisha barakeysan ee Ramadaan.

Agaasimaha Radio Muqdisho Mudane Cabdifataax Daahir Jeyte ayaa sheegay inay sharaf u tahay in markale ay qabanayaan tartan cilmiyeedka, iyadoo ay dhageystayaasha iyo daawadayaasha ay ka kala socon doonaan Warbaahinta Qaranka, sida Telefishinka iyo Radio Muqdisho, isla markaana uu sanadkan yahay kii 7aad ee ay qababeyso Warbaahinta Qaranka.

Agaasimaha Telefishinka Qaranka Liibaan Cabdi Cali ayaa sheegay in barnaamijkan uu soo bilowday sanadkii 2012-ka, afar sano oo ka mid ah mudadii la soo qabanayay waxaa maal gelinayay maamulka Gobolka Banaadir, sanadkan waxaa ka qeyb galaya 28 degmo oo ay ku jiran 17-ka degmo ee gobolka Benaadir.

“Saddex degmo ayaa isugu soo bixi doono, kuwaasi oo kala geli doona Kaalimaha Kowaad, labaad iyo saddexaad, waxaana maamulka gobolka uga Mahadcelineynaa sida aad nooga qeyb qaadaneysaa taabo gelinta tartankan” ayuu yiri Agaasime Liibaan.

Kusimaha Agaasimaha Guud ee Wasaaradda Warfaafinta Mudane Cabdiraxmaan Sheekh Yuusuf Al Cadaalla ayaa sheegay in tartankan uu soo maray marxalado kala duwan, waxaana uu ujeedku yahay in ay ka faa’iideystaan dhammaan Ummadda Soomaaliyeed, meelkasta oo ay joogaan.

“Faa’iidooyin badan ayaa Barnaamijkan laga dhexlay, waxaana la ogaaday in barnaamijkan uu xoogga saarayo barashada taariikhda dalka, taasi oo fursad u siisay bulshada inay wax badan ka kororsadaan cilmiga uu xambaarsanyahay barnaamijka, waxaa kaloo ka mid ah in dadka ay ka faa’iideysteen degmooyinka iyo gobollada dalka” ayuu yiri Agaasime Cadaala.

Guddoomiyaha Gobolka Benaadir ahna duqa Muqdisho Mudane Thaabit Cabdi Maxamed ayaa ugu horeyn Wasiirka iyo agaasimeyaasha uga mahadceliyay qaqsoomidda barnaamijka tartan aqooneedka, waxaana uu si gaar ah labada degmada ee ku tartamaya u rajeeyay inay guuleystaan, sanadkan kiisa xigana ay ku gaaran horumar.

“Waxaan rabaa inaan waxyar ka sheego taabo gelinta tartan cilmiyeedkan oo ay sameyneyso maamulka Gobolka Benaadir, waxaana aad ugu rajo weynahay inay noqoto mid joogto ah, waxaana Ummadda uga Mahadcelineyaa, gaar ahaan waalidiinta ku dhiirigeliyay inay carruurtooda ka qeyb galaan tartankan” ayuu yiri Guddoomiye Thabit.

Guddoomiyaha ayaa hambalyo u diray dhammaan ka qeyb galayaasha tartan aqooneedka bisha Ramadaan ee ay sanad waliba qabato Warbaahinta Qaranka, waxaana uu wax lagu farxo ku tilmaamay in aqoon lagu tartamo, isla markaana ay maskaxda maalaan.

“Waxaan rabaa inaan nasiib wanaagsan u rajeeyo labada degmo oo mid ka mid ah ay tahay Warta Nabadda iyo tan Xudur ee gobolka Bakool, waxaana idinku xasuusinayaa inay soo bandhigtaan aqoontiina, waxaana rabaa inaan bulshada u sheegno inaan bilownay Olole nadaafadeed oo aan rabno inaan ku soo celino bilicda caasimadda, waana mid bille ah, iyadoo ay jiraan mid degmooyinka oo isbuucle ah” ayuu yiri Guddoomiyaha Gobolka Benaadir ahna duqa Muqdisho.

Guddoomiyaha oo ka hadlayay arrimaha amniga ayaa sheegay inay muhiimtahay Nabadgelyada, waxaana uu intaa kudaray in amniga lagu xaqiijin karo, kalsoonida shacabka oo la hela.

“Waxaa lagu guuleystay in gacanta lagu soo dhigo rag falal dil ah geystay oo ay ugu dambeeyeen labo dhallinyaro ah oo dil ka geystay degmada Hodan, kuwaasi oo iminka gacanta lagu hayo, waxaana rabnaa in shacabka ay xoojiyaan la shaqeynta ciidamada amniga, si loo xaqiijiyo guud ahaan Nabadgelyada dalka” ayuu yiri Guddoomiye Thaabit.

Wasiirka Wasaaradda Warfaafinta iyo Hanuuninta Dadweynaha ee Xukuumadda Federaalka Soomaaliya Mudane Eng, Cabdiraxmaan Cumar Cismaan Yariisow oo si rasmi ah u furay tartan cilmiyeedka bisha barakeysan ee Ramadaan ayaa ugu horeyn Ummadda Soomaaliyeed ugu hambalyeeyay bisha Ramadaan, waxaana uu Alle ka baryay in Soomaaliya uu Alle dhibaatada ka qaado, bulshaduna ay is cafiyaan.

Wasiirka ayaa xusay in barnaamijka uu yahay mid wacyi gelin ah oo bulshada lagu barayo taariikhdooda, waxaana uu intaa ku daray inay joogteyn doonaan barnaamijyada nuucaani oo kale ah.

“Runtii wax yaabaha lagu tartama waxa ay ahayd mid dadku ay isku bartaan, runtii barnaamijka Kadis ayuu uga dhiganyahay, Agaasimeyaasha iyo inta kale ee ka qeyb qaadatay waan u mahadcelinayaa, runtii waan ku rajo weynahay in aqoon laga kororsan doono, runtii gobolka Benaadir ayaa markale taaba gelinaya tartanka, waana ku amaaneynaa guddoomiyaha gobolka Benaadir in uu howlfiican bulshada u haya, isla markaana ay mashaariic kala duwan ay caasimadda ka fuliyeen, doorka lagu taageerayo dowladda dhexe iyo hay’adaha kale ee dowladda” ayuu yiri Eng Yariisow.

Wasiirka Wasaaradda Warfaafinta iyo Hanuuninta Dadweynaha ee Xukuumadda Federaalka Soomaaliya Mudane Eng, Cabdiraxmaan Cumar Cismaan Yariisow ayaa ugu baaqay bulshada Soomaaliyeed inay is caawiyaan oo ay ka qeyb qaataan afurinta dadka walaalahood ee aan waxba heysan.

Tartankii ugu horeeyey ee Tartan cilmiyeedka Ramadaan ee sanadkan ayaa waxaa caawa lagu daah furay tartameyaasha degmooyinka Xudur ee Gobolka Bakool iyo  Warta Nabadda oo ka tirsan gobolka Benaadir.

    

Sawir Qaade: Khadar Cali Nuur 

Did you like this? Share it:

LEAVE A REPLY

Please enter your comment!
Please enter your name here