Wasiiro ka qeyb galay xaflad ay ku qalin jebinayeen arday baratay kuliyadda Caafimaadka “SAWIRRO”

Xafladan oo ay ku qalinjabinayeen 86-dhaqaatiir oo ka qalin jabiyay kuliyadda caafimaadka ee Jaamacadda Soomaaliya gaar ahaan Waxbarashada heerka koowaad ee Jaamacadda (Bachelor degree) ayaa waxaa ka qeybgalay Wasiirka Caafimaadka Soomaaliya, Wasiir ku-xigeenka Waxbarashada iyo tacliinta sare, Wasiiru dowlaha Wasaarada Ganacsiga iyo Warshadaha, Wasiir ku-xigeenka shaqada iyo arrimaha bulshada,Wasiir ku-xigeenka howlaha guud iyo dib u dhiska, maamulka iyo macalimiinta Jaamacadda Soomaaliya iyo qeybaha kala duwan ee bulshada.

Dr Xasan Saleemaan Maxamed oo ku hadlayay magaca ardaydii maanta xafladda qalinjabinta ah loo qabtay ayaa halkaasi ka balanqaaday in cilmiga caafimaadka ee ay barteen ay wax ugu qaban doonaan dadka Somaaliyeed, isla markaana aysan ka caaijisi doonin u adeegidda bulshada.

Madaxa Kuliyadda Caafimaadka Jaamacadda Soomaaliya Dr Yaasin Axmed Nuur Ayaa sheegay in dhaqaatiirta ay soo saartay Jaamacadda ay yihiin kuwa ay sareyso tayada aqoontooda, isla markaana lagu aamini karo howlaha Caadfimaadka.

Guddoomiyaha Jaamacadda Somaaliya Prof. Ismaaciil Cali Siyaad  oo xafladda ka hadlay ayaa u hambalyeeyay ardayda, wuxuuna intaasi kadib kula dardaarmay inay ilaaliyaan magaca Jaamacadda iyo anshaxa caafimaadka oo ay noqdaan kuwa ka soo guta waajibaadka ka saaran wax u qabashada bulshadooda.

Wasiir ku xigeenka Wasaaradda Waxbarashada iyo Tacliinta sare ee Somaaliya Mudane Xaamud Cali Xasan ayaa xusay in ka Wasaarad ahaan ay ku dadaalayaan sidii ay ardayda maanta qalinjabisay ay u heli lahaayeen deeq waxbarasho oo ah heerka labaad ee Jaamacadda (Master degree).

Wasiirka Caafimaadka Xukuumadda Federaalka Somaaliya Xaawo Xasan Maxamed oo ugu dambeyn xafladda ka hadashay ayaa sheegtay in dalku uu aad ugu baahan yahay dhaqaatiir iyo kalkaaliyaal caafimaad oo tayo leh, sidaa darteedna ardaydan looga baahan yahay inay wax kusoo kordhiyaan adeegyada caafimaadka oo waxa ay barteen ugu adeegaan shacabka Soomaaliyeed.

Gabagabadii xafladda ayaa mas’uuliyiintii ka socday dhanka Dowladda iyo madaxda Jaamacadda Soomaaliya waxa ay halkaasi shahaadooyinkoodii ku gudoonsiiyeen ardaydii ka qalinjabiyay Jaamacadda Soomaaliya, kuwaasi oo ahaa dhaqaatiirtii ugu horeyay ee ay Jaamacaddu soo saartay.

Sequence 12.Still001 Sequence 12.Still002 Sequence 12.Still003 Sequence 12.Still004 Sequence 12.Still005 Sequence 12.Still006

LEAVE A REPLY

Please enter your comment!
Please enter your name here