Wasiiru Dowlaha Arrimaha Gudaha ee Soomaaliya oo ka warbixiyay socdaal ay ku tegeen gobolka Shabeelaha Dhexe “SAWIRRO”

3269

Wafdi uu hogaaminayay Wasiiru dowlaha Wasaaradda Arrimaha gudaha, Federaalka iyo Dib-u-heshiisiinta ee Xukuumadda Soomaaliya Mudane Cabdullaahi Faarax Wehliye ayaa howlo shaqo u tegay deegaanno ka tirsan gobolka Shabeelaha Dhexe, iyadoo wafdiga ay qeyb ka ahaayeen Wasiirada Arrimaha gudaha ee dowlad goboleedyada Koonfurgalbeed, Hirshabeelle iyo Galmudug.

Ujeedka socdaalka wafdiga ayaan ahaa hirgelinta barnaamijka Wadajir ee dardargelinta nidaamyada dowladaha Hoose ee dalka, iyadoo shir arrintaasi ku saabsan oo socday muddo saddex cisho ah lagu qabtay magaalada Jowhar ee xarunta Dowlad goboleedka Hirshabeelle, kaasi oo ugu dambeyn la isku raacay in la dhaqan geliyo nidaamyada dowladaha Hoose.

Sidoo kale wafdiga ayaa kulan gaar ah la qaatay qeybaha bulshada, kuwaasi oo warbixino looga dhageysanayay qeybaha bulshada, si loo ogaado baahiyaha gaarka ah ee ay qabaan.

Wasiirka Arrimaha gudaha ee Hirshabeelle Mudane Maxamed Cali Caadle oo wafdiga ku soo dhaweeyay magaalada Jowhar ayaa sheegay inay diyaar u yihiin dhaqan gelinta barnaamijka Wadajir ee nidaamyada dowladaha Hoose.

Xoghayaha Joogtada ee Wasaaradda Arrimaha gudaha ee Xukuumadda Soomaaliya Prof Yaxye Cali Ibraahim ayaa sheegay in barnaamijkan ay Wasaaraddu soo waday muddo badan, isagoo ku booriyay maamul goboleedyada inay dhaqan geliyaan barnaamijkan.

Wasiirka Arrimaha gudaha ee Dowlad goboleedka Koonfurgalbeed Soomaaliya Mudane Cabdiraxmaan Aadan Sate oo ku hadlayay magaca Wasiirada arrimaha gudaha ee dowlad goboleedyada ayaa sheegay inay soo dhaweynayaan qorsheyaasha ay waddo Wasaaradda Arrimaha gudaha ee Soomaaliya.

Wasiiru dowlaha Wasaaradda Arrimaha gudaha, Federaalka iyo Dib-u-heshiisiinta ee Xukuumadda Soomaaliya Mudane Cabdullaahi Faarax Wehliye ayaa sheegay in barnaamijkan wadajir ay ahmiyad gaar ah siineyso Wasaaradda, isagoo xusay inay gacan ka geysanaan fulinta barnaamijkan, isla markaana xoogga la saari doono dhanka dib-u-heshiisiinta.

Mudane Cabdullaahi Faarax Wehliye Wasiiru dowlaha arrimaha gudaha Soomaaliya iyo wafdiga uu hogaaminayo ayaa socdaal ku tegay Degmada Warshiikh, halkaasi oo si diiran loogu soo dhaweeyay.

Guddoomiyaha Degmada Warsheekh Axmed Xuseen ayaa mas’uuliyiinta uga warbixiyay baahiyaha gaarka ah ee ay qabaan.

Xildhibaan Mino Xasan Shibis oo ka mid ah Xildhibaanada Golaha Shacabka ayaa wafdiga uga mahadcelisay kormeerka ay ku tegeen Warsheekh, waxaana ay xustay in barnaamijka Wadajir ee nidaamka dowladaha Hoose uu yahay mid wax weyn u taraya bulshada gobolka.

Wasiiru dowlaha Wasaaradda Arrimaha gudaha, Federaalka iyo Dib-u-heshiisiinta ee Xukuumadda Soomaaliya Mudane Cabdullaahi Faarax Wehliye ayaa ka mahadceliyay sida diiran ee loogu soo dhaweeyay Degmada Warsheekh, isagoo xusay in baahiyaha gaar looga bixi karo inay dhaqan geliyaan barnaamijka ay waddo Wasaaradda.

“Barnaamijka wadajir ee nidaamka dowladaha Hoose waa barnaamij loogu talagalay in degmo weliba ay maamulkeeda soo dhisato oo ay sameystaan gole deegaan, kuwaasi oo dooran doono Guddoomiyaha degmada iyo ku-xigeenadiisa, haddiii shalay warqad la idinkugu soo magacaabi jiray guddoomiyaha, maanta arrintu halkaasi ma taagna, ee gacantiina ku doorta, Degmada Warsheekh waxa ay noqon doontaa tii ugu horeysay ee Barnaamijka laga hirgeliyo” ayuu yiri Mudane Cabdullaahi.

Wafdiga ayaa ugu dambeyn socdaal ku soo maray Degmada Balcad, halkaasi oo ay kula kulmeen maamulka Degmada iyo qeybaha bulshada, iyagoo soo indho indheeyay Warshaddii Dharka ee Balcad.

Wafdiga uu hogaaminayay Wasiiru dowlaha arrimaha gudaha ee Xukuumadda Soomaaliya oo socdaalkooda shaqo qaatay muddo afar cisho ah oo dhanka dhulka ah ayaa dib ugu soo laabtay Muqdisho.

Did you like this? Share it:

LEAVE A REPLY

Please enter your comment!
Please enter your name here