Waxqabadka Todobaadka ee Maamulka Gobalka Banaadir

Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng. Yarisow) ayaa saxiixay Habraaca Iibka iyo Qandaraasyada Dawladda Hoose ee Xamar iyo Maamulka Gobolka Banaadir.

 

Eng. Yarisow Guddoomiyaha Gobolka Banaadir ayaa sheegay in habraacani uu hagi doono Iibka iyo Qandaraasyada Dawladda Hoose, isagoo nidaaminaya hab-raaca bixinta qandaraasyada alaabta, dhismayaasha, adeegyada iyo qodobo kale oo muhiim ah.

“Habraacan ayaa suurto gelinaya maamul wanaag isla xisaabtan daah-furnaan iyo kalsooni beerista shacabka, bacdamaa ay xoojinayso caddaaladda sinnaanta iyo horumarka Caasimadda”. Ayuu yiri Duqa Muqdisho.

Guddoomiyaha Gobalka Banaadir ahna Duqa Magaalada Muqdisho ayaa todobaadkaan dhagax dhigay biyo fadhiisidka degmada Boondheere oo haatan lagu sameeynayo dayac tir xoog leh.

Duqa Muqdisho ayaa aad iyo aad ugu ammaanay shacabka iyo maamulka Degmada Boondheere dadaalka ay ugu jiraan horumarinta Degmada, wuxuuna ku bogaadiyay inay sii laba jibaaraan dadaalkooda.

Eng. Cabdiraxmaan Cumar Cismaan Yariisow Guddoomiyaha Gobalka ayaa Todobaadkaan Booqasho u tagay degmada Hilwaa gaar ahaan xaafadda Waxarcadde, si uu u dhiiragaliyo ulana socdo xaaladooda dadka xoogsatada ah ee ka shaqeeya Kaawada Dhismaha.

Guddoomiyaha ayaa kala sheekaystay Xaaladooda xoogsatada, isagoo sidoo kale u sheegay inay shaqo muhiim ah u haayaan dadka iyo dalka, wuxuuna Duqa Muqdisho aad ugu dhiiragaliyay Shaqadooda.

Guddoomiyaha Gobalka Banaadir ayaa kormeer ku sameeyey Garoonka Qoob-dooro ee degmada Kaaraan, Xarumaha degmooyinka Howlwadaag, Hodan , iyo bulaacadda No4 oo dhammaantood howllo shaqo oo dib loogu dhisayo uu M/mulka Gobolka Banaadir ka wado, isagoo ugu baaqay shacabka Caasimaddu in ay u midoobaan dib-u-dhiska iyo horumarinta dalkooda.

Eng. Yarisow ayaa tilmaamay in xarumaha degmooyinka Hodan iyo Howlwadaag ay burburiyeen kooxaha argagixisadu, Maamul banaadir uu dib u dhisayo si loogu adeeggo shacabka Soomaaliyeed, iyadoo goobaha dib loo dhisayo uu ku jiro Masjidka Degmada Howlwadaag ee ku burburay qaraxii argagixisadu la beegsadeen.

“Argagixsadu waxay beegsanayaan nafta iyo maalka shacabka Soomaaliyeed ee waxba galabsan, Maamulka Gobolka Banaadir na waxuu u taagan yahay badbaadinta iyo dib u dhiska Caasimadda’.

Duqa Muqdisho ahna Guddoomiyaha Gobolka Banaadir Mudane Cabdirixmaan Cumar Cusmaan (Eng.Yarisow) ayaa daah furay mashruuc lagu tababarayo 400 oo dhalinyaro ah, kuwaas oo isaga kala yimid magaalooyinka Muqdisho, Baydhabo iyo Kismaayo.

Mashruucan oo ay maalgelisay UNDP waxaa loogu talo galay in ay ka faa’iidaystaan 400 oo dhalinyaro ah iskuguna jira dumar iyo rag. Mashruucan waxaa ardadan 3 bilood lagu barayaa xirfada samaysta iyo dayactirka Solarka kadibnaka inta qalin jabisay ayaa la siinayaa qalab ay ku shaqo tagaan iyo 6 bilood oo internship ah.

Guddoomiyaha Gobolka Banaadir ayaa furitaanka mashruucan ka sheegay in maamulkiisa ay ka go’an tahay shaqo abuurka dhalinyarada, si xal loogu helo shaqo la’aanta isla markaana maamulku uu xoogga saarayo tababarada xirfadaha dhalinyarada lagu dhisayo.

Duqa Muqdisho ayaa xafiiskiisa ku qaabilay Todobaadkaan Danjiraha dowladda Suudaan u fadhiya magaalada Muqdisho ee Caasimadda Soomaaliya

Danjire  Kalfallah Mustafa Babikir iyo Mudane Eng, Cabdiraxmaan Cumar Cusmaan ayaa ka wada hadlay mataanaynta Caasimadaha Soomaaliya Suudaan ee kala ah Muqdisho iyo Khartuum.

 

 

 

LEAVE A REPLY

Please enter your comment!
Please enter your name here