Wefdi hor u dhac u ah madaxweynaha Koofur Galbeed oo maanta gaaray Xuddur +Sawirro

Magaalada Xuddur ee xarunta gobolka Bakool maanta waxaa gaaray wefdi uu hogaaminayo wasiirka maaliyadda Koofur Galbeed ayna kamid yihiin wasiirka gaadiidka iyo mas’uuliyiin kale oo ka tirsan maamulka.

Imaanshaha wefdigan ayaa ku soo aadaya xilli magaalada ay ka soo yeertay qaylo dhaan ku aadan dhibaatada ka dhalatay xayiraadka argagaxisada Alshabaab saareen shacabka gobolka Bakool gaar ahaan Xuddur.

Wariyaha warbaahinta qaranka, Siraaji Sheekh Isxaaq, oo la socday wefdiga maanta gaaray Xuddur ayaa sheegay in mas’uuliyiintan ay hor u dhac u yihiin madaxweynaha Koofur Galbeed Cabdicasiis Laftagareen oo halkaas tagi doona dhowaan.

Xuddur muddo sideed sano ah waxaa go’doomin ku haya maleeshiyaadka Alshabaab, arrintaas oo shacabka magaalada ku keentay culeys dhanka nolashada ah, hase yeeshee bilihii u dambeeyay Alshabaab ayaa labo laabay xayiraadka magaalada waxay gubeen gaadiid badan oo magaalada u siday raashiin iyo waxyaabaha nolashaa muhiimka u ah.

LEAVE A REPLY

Please enter your comment!
Please enter your name here