Xaflad xusuus iyo duco ah oo Muqdisho loogu sameeyay Marxuum Maxamed Jaamac Cali “MJ”

0
486

 Wasaaradda Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya ayaa Xaflad duco iyo xusuus ah ugu qabatay xarunteeda Marxuum Maxamed Jaamac Cali “MJ” oo April 08, 2018 ku geeriyooday Muqdisho.

Xafladan ducada ah oo ay ka soo qeybgaleen Wasiirro, Xildhibaanno ka kala tirsan labada aqal ee Baarlamaanka, qaar ka mid ah danjirayaasha Soomaaliya, qaar ka mid ah saraakiisha ciidamada, diblomaasiyiin, samadoonno, indheer garad, aqoonyahanno iyo dad wax ku ool u ah bulshada, waxa ayna dhammaantooda Allah uga baryeen Marxuum Maxamed Jaamac Cali “MJ” in hoygiisa ka dhigo Jannada sare ee Alfardows.

Hadallo ay xafladda ka kala jeediyeen Danjire Dr. Elmi Ahmed Dualeh iyo Xildhibaan Dr. Zakariye Maxamuud Xaaji Cabdi ayaa ammaan iyo boggaadin u jeediyay howlihii uu qaranka u qabtay Marxuum Maxamed Jaamac, iyaga oo Allah uga baryay in qabrigiisa ka dhigo beer jannaad.

Xoghayaha Joogtada Wasaaradda Arrimaha Dibadda iyo Iskaashiga Caalamiga Danjire Cali Maxamed Cali “Cali bin Cali” ayaa ka qeybgalayaasha xafladda xusuusiyay in naf waliba ay geeri dhadhamin doonto waqtigeeda, dadkana looga baahan yahay inay ku waano qaataan, xusuusnaadaan Allah, waxaana uu u duceeyay saaxiibkiisii Marxuum Maxamed Jaamac Cali oo uu Allah uga baryay inuu u nuuriyo xabaasha, iilka neecaw udgooniyo, ku siiyo naruuro.

Wasiirka Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya H.E. Amb. Ahmed Issa Awad, ayaa saraakiisha iyo agaasinnada kala duwan ee Wasaaraddiisa uga mahadceliyay sida had iyo jeer ay u maamuusaan aaska iyo xafladda duco ee ay u qabtaan saaxiibadooda shaqada ee geeridu ay haleesho, isagoo muujiyay sida uu ugu qanacsanaa talooyinkii wax ku oolka ahaa ee uu ka helay Marxuum Maxamed Jaamac inta aanu geeriyoon, waxaana uu Allah uga baryay dembi dhaaf iyo naxariis.

Allah u naxariisto, Danjire Mohamed Jama Ali “MJ” waxa uu ka ahaa xubin firfircoon Guddiga dib u habeynta Wasaaradda, waxaana uu dalkiisa iyo dadkiisa u adeegayay muddo 32 sano, isaga oo muddo 13 sano ah u shaqeynayay Wasaaradda Arrimaha Dibadda, halka 19 sano uu u soo shaqeeyay Wasaaradda Xanaanada Xoolaha.

 

Did you like this? Share it:

LEAVE A REPLY

Please enter your comment!
Please enter your name here