Xuska sanad guuradii 2 aad ee Afgambigii fashilmay ee Turkiga oo Muqdisho ka dhacday + Sawirro

1284

Danjiraha Turkiga ee Soomaaliya, Olgen Bekar oo maanta ka hadlayay xuska sanad guuradii labaad ee afgembigii dhicisoobay ee Turkiga ka dhacay 15 Luulyo, sanadkii 2016 ayaa ku dheeraaday dhacdooyinkii ku heeranaa isku daygaas fashiley iyo sidii geesinimada laheyd ee shacabka Turkiga uga dhiidhiyeen in nidaamkooda dowladnimo laga weeciyo dhabihii uu hayay.

 

Dajiraha ayaa xusay in isku daygaas Afgambi ay ku dhinteen ku dhowaad 300 oo ruux isla markaana ay ku dhaawacmeen in ka badan 2000 oo kale, afgambigaas  oo uu sheegay in ay ka gedaal ka taagnaayeen xulafada wadaadka dibad jooga ah ee Fatxulah Gullen.

Taageerada ay shacabka Soomaaliyeed muujiyay ayuu danjire Olgen Bekar ku sheegay in ay aheyd taarikh kale oo quluubta Turkidu ka go’i doonin, isagoo sheegay in dowlad iyo shacab dadka Soomaaliyeed aan loo kala harin is garab istaaga dalka iyo dadka Turkiga.

Danjire Olgen Bekar, safiirka Turkiga u fadhiya Soomaaliya, ayaa sidoo kale sheegay in walaaltimadaas xoogan ee ka dhaxeysa Soomaaliya iyo Turkiga uu sii jiri doono.

Wasiirka Warfaafinta Soomaaliya, mudane Daahir Maxamuud Geelle, oo kamid ahaa mas’uuliyiintii munaasabadda lagu casuumay ayaa sheegay in isku daygii afgambi ee fashiley ee Turkiga ka dhacay uu ahaa bar madow uu ku dhigan taariikhda casriga ah ee Turkiga.

Mudane Daahir Maxamuud Geelle, ayaa sidoo kale, sheegay in abaal weyn u hayaan Turkiga dadka Soomaaliyeed isla markaana shacabka Turkiga ugu hambalyeeyay sida ay uga hortageen kuwa doonayay in ay xukunka wadanka xoog ku qaataan.

Wasiirka wasaaradda warfaafinta, dhaqanka iyo dalxiiska Soomaaliya, mudane Daahir Maxamuud Geelle ayaa tilmaamay in caadigan afgambiga uu yahay mid ceeb ah maadaama hubkii qaranka lagu waardiyaynayay lagu soo leexiyo isla calankii iyo shacabkii ay aheyd in lagu ilaaliyo.

Wasiirka, ayaa intaa ku daray in Soomaaliya inkastoo dhibaato ay ka jirto hana ay ka gudubtay in xukunka xoog lagu kala qaato taa bedelkeedana si dimoqraadiyad ah lagula kala wareego.

Munaasabadda ayaa waxaa ka qeybgalay xildhibaano ka tirsan labada golaha ee baarlamaanka, danjiraha dowladda Qatar ee Soomaaliya, mas’uuliyiin kale oo kala tirsan Soomaaliya iyo Turkiga.

           

 

Did you like this? Share it:

LEAVE A REPLY

Please enter your comment!
Please enter your name here