Madaxweynaha Galmudug oo Jubbaland uga tacsiyadeeyay falkii lagu qarxiyay ciyaartooyda Kooxda JCCI

Madaxweynaha Dowlad Goboleedka Galmudug Mudane Axmed Cabdi Kaariye Qoorqoor ayaa shacabka iyo dowladda Jubbaland uga tacsiyadeeyay dhallinyarada ku geeriyootay qaraxii Argagixisadu ay la beegsadeen baskii ay saarnaayeen ciyaartooyda.

“Waxaan Dowladda iyo shacabka Jubbaland uga tacsiyaynayaa qaraxii argagaxisadu maanta la beegsatay Kooxda Kubadda Cagta magaalada Kismaayo. Naxariistii janno Allaha ka waraabiyo dhallinyaradii ku geeriyootay, inta dhaawacana Allaha caafimaad degdeg ah siiyo Insha’allah”. Ayuu yiri Madaxweynaha Galmudug.

Madaxweynaha Galmudug ayaa xusay in Kooxaha argagixisada ay caadeysatay daadinta dhiigga ummadda Soomaaliyeed, isagoo tilmaamay in laga guuleysan doono Argagixisada, isla markaana laga sifeyn doonaa deegaanada dalka oo dhan.

Mudane Axmed Cabdi Kaariye ayaa ugu baaqay dhamaan shacab iyo dowladba in hal meel looga soo wada jeesto cadowga ummadda Soomaaliyeed ee Al-Shabaab.